Im Ehregrab
Lothar Sattel, Waldsee
Im Dood noch uff em Sterwekisse
Hab ich em fescht verspreche misse:
Im Riewebeet muscht mol net ligge,
Du sollscht e bess’res Plätzel krigge!
Grad war ich korz mol mit em Spaade
Mitsamt em Klää im Kerchegaade.
Jetzt ruht er mit em Domprälat
Zusamme im me Ehregrab.
Kriggt hohe B’such un frische Blumme,
Fascht jedi Woch un ganz fer umme.
Es Ewisch Lichdel vorne draa,
Des hot aa meim Bu gut gedaa.
So kummt ma dann – es kännt jo soi –
Zum Herrgott in de Himmel noi.
Des sieht selbscht der net alle Daag:
En Hamschder newer ääm Prälat!
2006, Kategorie: Lyrik, Platz 4
Beitrag anhören: mawdh-2006-ehregrab.mp3 (354,90 KB)
Kummt känner bei
Lothar Sattel, Waldsee
do steh ich rum un waad ob er kummt rausgebutzt hänn se mich extra fer ihn sogar en Scheidel hänn se mer gezooche jetzt steh ich do un’s kummt känner bei dungel is un bidderkalt ma holt dich ab so hot ma’s g‘saat un ich steh do un frier frier mich starr u steif `s is so arrisch duuschder um mich rum un still so – dodestill un ich waad
ja – ich waad
Was uns in Dunkelheit begleitet
Ist die Hoffnung
2020, Kategorie: Dichtung, Preisträger
Drauß uff de Neggarwiss
Lothar Sattel, Waldsee
Do liggt er jetz uff dere Pritsch zwische all denne Abbaradure. De Dokder nickt un eilt wortlos aus em Zimmer. Bloß de Wegger uff em Nachtdisch heert ma noch tigge. Die Jalousie am Fenschder hänn sem heit e bissel runnergezooche. Awwer des hätt's garnimmi gebraucht.
'S geht uff Owend zu. Drauß vor de Deer heert ma grad änner laut lache. Die Schwester macht sich noch an all denne Geräde zu schaffe. Jetz zieht se die letschde Stecker raus. Sie muss sich dummle, ehr Schicht is schun rum un dehääm waad de Froind. De Blummestrauß uff de Fenschderbank fangt schun langsam aa zu driggle. Ob ma denn mitnemme wollt, will se wisse, un ob se die Vas widder zurickstelle kännt fer de Näggschde, wu kummt. Ma sollt aa die Klääder un die Wertsache im Schrank net vergesse. Ach, un an die Hausschlabbe unnerm Bett soll ma aa denge. Die wärn noch ziemlich nei un ma kännt se aa bestimmt noch brauche.
Durch die Jalousie sieht ma die Sunn langsam unnergehe.
Drauß uff de Neggarwiss spielt e Mädel mit ehrm Hund. Der will net so richdisch un laaft re ääfach devu. Sie hinnenooch.
E Liewespäärle liggt uff de Deck. Er hot die Hand uff ehrm Knie un sie pischbert em ebbes ins Ohr. 'S kann nimmi lang daure bis es dungel wärd. Paar klääne Buwe jagen ääm Ball hinnerher. Was dowen die rum, die junge Frägger!
En alde Mann hockt allää uff re Bank und fiddert die Ende.
Grad kummt e Schiff vorbei. Ob die dess noch rechtzeidisch zum Monnemer Hafe schaffen bis es dungel is? Vielleicht geht's morge dann weider, de Rhoi nunner, em Meer zu.
Vun Ferne heert ma e Modorsäg kreische. Im Park vis a vis wärd noch schnell en Baam g'fällt.
Owwe liegt er immer noch uff soine Pritsch. Nä, ma hätt werklich nix mäh mache känne und's wär besser g'west so, fer ihn, määnt sie un nimmt em die Bettpann weg. 'S fascht nix drinn, awwer die braucht er jetz eh nimmi. Jo, un's Zahberschdel uff de Ablag sollt ma aa net vergesse.
"Un Widdersehn", seggt se noch beim Rausgehe, un macht sich ganz schnell devu.
2021, Kategorie: Prosa, 1. Platz