DICHTUNG
- 2023, Kategorie: Dichtung, 1. Platz -
Iwwerfall vum Läwe
Von Maritta Reinhardt, Wonsheim
Schdurmgebimmel on de Deer
Met Urgewalt blatzt bundes Läwe in de Hausgong
Borzelt in alle Egge
Denzelt bis unners Dach
Unn kisst sich in mei Herz
Es Läwe lacht
Unn hott Hunger
Schebbt mem große Leffel aus dombende Schissele
Kaut unn babbelt gleichzeidisch
Dass ich nore so schdaune
Eilisch laaf ich hie unn her
Damet alles basst
Damet ich nix vebass
Worde unn Nexereie fliehje iwwer de Disch
Endlich schafft nore noch die Schbiehlmaschin
Beim Schbazeere ums Ort truwelt es Läwe um mich erum
Vezeehlt mer vun de Arwett, vum Urlaub, de kabutt Wäschmaschin.
Ich gäwe Rotschläch unn bin froh
Om Kaffeedisch vebutzts es Erdbeerberremsche
Macht Flegge uff die nei Dischdegg
Unn fleezt sich noch e bissje uffem Konnebee erum
Bis es Zeid wärd uffsebreche
Gonz feschd driggts mich
Es bunde Läwe
Bevors wirrer enaus in die Welt schderzt
Ich bleiwe serick
Met leere Gläser
Vegessene Jagge
Ner nei App uffem Handy
Unn soveel Ruh
Dass es weh dut
- 2023, Kategorie: Dichtung, 2. Platz -
Refugees Welcome in de Palz, awwer …
Von Manfred H. Schmitt
Es muss doch mol gsaat werre:
Es ist net bloß okay, sondern es is ä Must,
Dass die Flichtling all rischtisch Deitsch lernen.
Die missen doch bei uns live babble kenne, face to face,
Um än „coffee to go“ ordere zu kenne am Desk vum „drive in“
Odder ä Ticket kaafe zu kenne fer de Shuttlebus am Display vum Automate.
Die missen wisse, dass sie in de Mall vum Shopping Center
Im „Sale“ än clevere Deal mache kennen,
Wenn se sich fer ä cooles Outfit
Sneakers odder ä T-Shirt kaafe wollen,
Vielleicht aa Shorts, Slips oder Pants.
Des is doch sicher en Event fer des Poor People!
Aa in die Palz sollen se sich integriere,
Kennen in ennere hippe Wine Lounge ä Tasting mache
odder beim Wine Walk Pälzisch lerne.
Un im Pälzer Wald finnen se Outdoor Adventure
mit super Mountain Bike Trails.
Sie brauchen bloss ä bissel Equipment defor,
um ä bissel Fun zu hawwe.
Un wenn se bei uns en Job hawwe wolle:
In unser Team kummen se bloß, wenn se deitsch kennen.
Do checken se glei, wie unser Business so laaft.
Jo, do missen mer all Hardliner soi,
Es derf ken foule Deal gewwe:
Ohne Deitsch in de Pipeline ist nix mit Money.
Beim Jobcenter wern fer die manche Super Services agebote:
Dort kennen die Flichtling en Workshop in Team Building mache.
Mit all dem Know-how sin se dann up to date
Un fit fer unser deitsch Community.
Sie hawwen dann die Performance fers Team Made in Germany
un sin dezu noch Ready For Globalization!
Beim Lerne gibt‘s aa super Jobs fer Lehrer,
Die sollen die Newcomer und Newcomerinne
Am Whiteboard teache, trainiere oder coache,
Live oder digital on screen in home lessons.
Step by step kennen se dann die Highlights von Goethe und Schiller lese
Und lernen de Sound schätze vun unsere coole Sproch.
Last but not least:
Ich hoff uff viele Followers und Supporters,
Moi Agenda muss ä Turnaround astoße,
Vielleicht kann ma aa ä Task Force defor uffstelle!
Is moi Statement fer eich okay?
Also dann: Go! De Countdown laaft -
Damit die Auslänner so gut in Deitsch un in Pälzisch werren wie mir!
- 2023, Kategorie: Dichtung, 3. Platz -
Liebe Besucherinnen und Besucher dieser Seite, es wurde gestern, 11.07.2023, versehentlich ein - ebenfalls sehr guter Preisträger, jedoch nicht der korrekte 3. Platz - abgebildet. Der 3. Platz des 36. Mundart-Wettbewerbs wurde an Hermann Grundhöfer vergeben, hier ist sein Gedicht.
Es Bänkl vorm Haus
Von Herrmann Grundhöfer, Harthausen
Vorm Haus uff em Bänkl hoggen do
die Baas Marie und ehrn Monn, de Jean.
Sie guggen als dord un als do mol hie
de Vedder Jean un die Baas Marie.
Un näwedro uff soim ääschene Sidz,
hoggd ehrn Hund, de alde Daggl Fritz.
Sie guggen zamme des Schdroßelääwe oo,
de Daggl Fritz, die Baas Marie, de Vedder Jean.
So sidzen se om Schdroßerond;
die Baas ehr Schdriggzeisch in de Hond,
de Vedder dud soi Peifel raache
un känner duud e Werdel saache.
So hoggen se faschd immer do,
die Baas Marie, de Vedder Jean.
Wonn onner Leid vorbei schbaziere,
donn duhn se mit ne dischbediere.
Die Dorfgschichd werd do gridisierd
un hefdisch driwwer disgudierd,
un was bei’s Nochbers so bassierd,
do driwwer werd sisch eschoffierd.
Die Johre ziehen iwwers Lond,
bassierd is jo schun allerhond.
Em Jean soi Peif werd efders kald,
de Baas es Schdrigge schwerer falld.
Sie gehn ball uff die hunnerd hie
de Vedder Jean un soi Marie.
So wie’s mol war, es gehd ned mehr
un alles falld en furschdbar schwer.
De Zittres kummd, `s wern schwer die Knie
beim Vedder Jean un de Marie.
Die Hoor wern wenischer un groo
bei de Marie un aa beim Jean.
Em Fritz soi Grab ziehrn Kreiz un Schdää,
sie sinn blooß noch zu zwädd allää
Uff äämol bleibd aa ´s Bänkel leer;
de Jean, die Marie gebd’s ned mehr.
Es Bänkl schdehd alää noch draus,
de Blatz siehd gonz verlosse aus.
Vun jedzd uff nochher känner do,
kän Fritz, kä Marie un kän Jean.
Ball schdehd kää Bänkl mäh vorm Haus,
de Bladz siehd noch verlossner aus.
Blooß uff ääm Schild do kommer lääse
was sellemols do war geweese:
Uff ääm Bänkl hott ghoggd do
die Baas Marie als un ehrn Jean,
un näwedro en schääne Sidz
war fer ehrn Hund, de Daggl Fritz.
PROSA
- 2023, Kategorie: Prosa, 1. Platz -
Die Katz im Sack
Von Edith Brünnler, Ludwigshafen
Also des hätt ich nie vun moinere Kussine gedenkt, dass die so ebbes macht. Jetz
wääß ich aa, wieso die laufend neie Klääder ghabt hot. Die hot se immer bestellt,
ään Owend agezooche, un am nägschde Daach widder zurickgschickt. Nur so was
geht nadierlich net ewisch. Inzwische isse iwwerall gsperrt – vun A bis Z, also vun
Amazon bis Zalando. Des gschieht re aa ganz recht.
Ich mään, dass mer erscht emol gugge kann, ob des soi Geld wert is, was die em do
abiede, des is jo net verkehrt. Wer kaaft schun gern die Katz im Sack? Mer derf s
halt bloß net iwwertreiwe.
Awwer vun derre Bestellerei im Indernet hawwisch noch nie was ghalde. Des is mer
viel zu uperseenlich. Do geh ich liewer in die Gschäfde un redd midde Leit.
Grad deletscht war ich widder in unsre Buchhandlung un hab mer en Krimi empfehle
losse. Des mach ich alle paar Woche. Do setz ich mich in die Lese-Eck un blädder e
bissel drin rum. Nur sin die meischde so spannend, dass ich immer weider lese
muss. Der Buchhännler saacht do normal aa nix. Bloß dissmol war s annerscht.
Korz vor Ladeschluss hawwisch den Krimi ausgelese ghabt un wollt grad
nauswitsche, do hodder mich uffghalde.
„Des geht awwer net, dass Sie dauernd unser Bicher lese un käns kaafe. Mir sin
doch kä Leihbicherei.“
„A no“, hawwisch gsaat, „wann Sie mir awwer aa immer so spannende Krimis
empfehle! Des hädde se sich doch denke känne, dass mer do net zwischedrin
uffheere kann.“
„Dann kaafe Se wennigschdens äner“, hodder gedobt.
„Ich kaaf doch kän Krimi, wu ich de Schluss schun kenn. Un bei me annere misst ich
erscht noigugge. Wann ich vielleicht morge noch emol kumme kännt …“
Do is der uff ämol rot ageloffe. „Naus!“, hodder gekrische. „Un losse Se sich dohin
nimmi blicke.“
No hawwisch gemacht, dass ich fortkumme bin. Es is mer jo net weggem Geld,
awwer der Nervekitzel, ob s funktioniert odder net, der hot schun was.
Als Nägschdes wollt ich ebbes mit Bewegung mache. No hawwisch in de Zeidung
gelese, dass die Danzschule e koschdeloses Probetraining abiede. Ich war sofort
Feier un Flamm. Wiener Walzer, Rumba, Salsa – des war subber. Ich hab sogar
noch en zwädde Schnubberkurs kriggt, dass ich rausfinne kann, was mer am
meischde Spass macht. Die Ameldung hawwisch erscht emol mit hääm genumme
un hab gsaat, ich meld mich widder. Awwer mol ehrlich, eigentlich reicht em doch
sowieso Ääns-Zwää-Tipp – so Disco-Fox, wie mer des frieher gemacht hot. Mir
isses ganz bestimmt net weggem Geld, des wissener jo. Awwer dass des mit dem
extra Probetraining geklappt hot, des war mer nadierlich Wasser uff die Miehl.
No bin ich mudisch worre un hab s in eme Sportstudio prowiert. Des is nämlich net
äfach, do en Schnubberkurs zu krigge. Hänn ihr gewisst, dass die unnernanner
vernetzt sin? Wu ich in dem erschde alle Geräde ausprowiert ghabt hab, hänn se
mich im zwädde gar nimmi noi gelosst. Vun mir hädde se schun gheert. Ich wär
doch die, wu nie was bezahle wollt, hänn se gemäänt. Wann ich glei fer e Johr
unnerschreiwe deet, wär s in Ordnung, awwer sunscht … Ich wollt ne noch erkläre,
dasses mir ganz bestimmt net weggem Geld is. Nur, wu ich dann denne ihr
Muschkle gsehe hab, hawwisch s liewer gelosst.
Jetz mach ich erscht emol e Paus, awwer fer die Adventszeit hawwisch mer was
ganz Bsunneres iwwerleggt. Do geh ich in unsern Blummelade un versuch zwää
Chrischtbääm zur Asicht zu krigge. Der wu zuerscht noodelt, den bring ich dann glei
widder zurick. Des wär s Greeschde fer mich. Driggen mer die Daume, dass es
klappt.
- 2023, Kategorie: Prosa, 2. Platz -
In de Waadeschleif
Von Cornelius Molitor, Kaiserslautern
Samschdaach Ohment. Ich steh in de Kich un mach merr e Doos Ravioli uff. Fascht hatt ich denne Bichsedeggel schun ab gehatt, do schnärrt des bleede Ding in die Heh un schneid merr mit seim scharfe Rand schää dief in de lingse Zeichefinger. Oär, hot des glei geblut! Fingerdick is merr die Brieh aus dere Wund gespritzt! Ich wääß net, scheints hun ich gekrisch vor Schreck, jedenfalls kummt mei Fraa gerennt, sieht mich mit meim uffgeschlitzte Finger, sieht wie's Blut eraus schießt, werd ganz blass un ziddert - un dann kreischt se: "Mei Kich, mei Kich, ich hun doch grad erscht frisch gebutzt!" Ahschließend hot se merr denne Finger dann mit so Kicherollebabier notderfdich vebunn. Dann saat se: "Waach dich, dass de merr noch e annerie Stubb vesausch! Du bleibsch wo de bisch, ich hol derr's Dellefon, dann rufsche de Notarzt ah!"
Sie bringt merr's Dellefon, ich wähl die Nummer un's geht bei denne ah glei änner drah. Ich hatt schun fascht mei ganzie Leidensgschicht vezeelt, do merk ich erscht, dass do am anner Enn jo bloß e Tonband laaft. Ehr kennen des jo: "Zurzeit sind alle Mitarbeiter im Gespräch. Bitte legen Sie nicht auf, Sie werden gleich verbunden ... bla-bla-bla." Un dann is Mussick geloff: "Heile heile Gänsje", 's Original aus de Määnzer Fassenacht vun sellemols, an ähner Tour un als un immer widder vun vorne! Un ich steh die ganz Zeit do in de Kich mit meim bluriche Finger. Laufend hummer denne Veband misse wechsele, weil de Sabbsch dorch des Babier gesotschert is.
"Des hosche jetz vun deine Ravioli!" saat mei Fraa. "Was musch du ah Ravioli esse?"
"Ich hun se jo gar net gess!" saa ich. "Was soll ich dann jetz bloß mache?"
"Ei do bestell derr halt stattdesse e Pizza!" saat se.
"Gudie Idee!" saa ich.
"Un ferr mich e Idaljänischer Salat!" saat se.
"E großer?" froo ich.
"E großer.“ saat se. "Un Bruschedda!"
"Des hääßt 'Brus-ketta'!" saa ich.
"Kluuuchscheisser!" saat se. Un dann: "Awwer bass uff: do ruf jetz besser ich mi'm Händi ah beim Idaljäner. Wie's Gewidder lehsch du do jetz uff bei demme Notarzt un weersch dann awwer glei drahkumm!"
"Gudie Idee!" saa ich.
Mei Fraa holt 's Pizzabläädche un ehr Händi un ruft beim Idaljäner ah.
"Un?" saa ich.
"Waadeschleif!" saat se.
"Was ferr Lied?" froo ich.
"'Zwei kleine Idaljäner' vun de Caterina Valente." saat se.
"Des is vun de Connie Froboess!" saa ich.
"Kluuuchscheisser!" saat se.
Jo, un ich steh als noch do in de Kich mit meim bluriche Finger, es Dellefon in de anner Hand, un die ganz Määnzer Fassenacht plärrt merr an ähner Tour ehr "Heile heile Gänsje" ins Ohr. Ich hun kenne schun alle Strophe ausewennisch mitsinge. Am beschte hot merr jo die Stell gefall, wo's hääßt "… in hunnert Johr is alles weg!" - do hatt ich dann wennischdens e zeitlichie Perschpektive. Irgendwann speerenaus hun ich zufällich mol erfahr, dass se des "Heile heile Gänsje" in de Waadeschleif bloß ferr die Privatpatiente spielen. Ferr die Kassepatiente spielen se 's "Lied vom Tod".
Awwer dann, noh re schiere Ewichkeit am Dellefon, hot sich doch werklich mol ähner gemeld bei denne Notärzt do. Un heer, ich muss saa: wann's mol klappt bei denne, dann klappt des ah! Weil kaum hatt's gehääß "Sie werden gleich verbunden ...", do klingelt ah schun korz denoh e Sanidäder an de Hausdeer - un der hot merr dann mei Finger so richdich professionell vebunn!
- 2023, Kategorie: Prosa, 3. Platz -
Annerschd
Von Dr. Friedrich Schmidt-Roscher
Dass es bei uns annerschd riecht un annerschd zugehn dut, des hann ich als Bu schun mitkrieht. Awwer lang hann ich net genau saan kenne, was genau annerscht is. Bei uns deheem, do wars enfach annerscht wie bei de annere Leit.
Es war annerscht wie beim Unkel Herbert. Beim Unkel hat kenner was gesaat,
wann die Katz uffem Kicheschrank rumgedribbelt is. Dodebei hann ich genau
gesien, dass se ihr Kopp in die Rehrschissel mittem Kuchedääg gesteckt hat. Wie de Kuche beim Kaffeetrinke dann uffem Disch gestann hat, noch ganz frisch und warm, hann ich enfach kee Appettit mee gehaat. Dodebei hat mer dem Mamorkuche eichentlich iwwerhabt nix angesieen. Awwer mich hat’s geschittelt Wann ich nur dran gedenkt hann, ich mers annerschd wor. An demm Daa hann ich kee Stickel Mamorkuche gess, obwohl die Dande Anni als gesaat hat: „Ess doch, Bu, damit mol was aus der werd.“
Annerschd wie deheem wars aa bei meim Freind Philipp. Demm sei Leit hann
imme Bungalow gewohnt, mit ganz viel Holz drin. Die hann schun e Blattespieler gehaat und hann net in de Kich gess wie mir. Sellemols war dere Kich so modern und kleen, dass die imme Esszimmer hann hocke misse. Do hat mer dann die Saladschissel dorch so e Loch ins Esszimmer gewwe kenne. Bei uns war des net needich, mir hann jo gleich in de Kich uff de Eckbank gehockt. Ich hann beim Freind viel annere Sache gelernt: Käsefondue, Brockhaus un dass e Schnapps im Wasserglas aussieht wie Wasser. Wie ich ne getrunk hann, is mers ganz annerschd wor. Es is dort aa annersch geween, weil mein Freind zwee ältere Schwestre gehaat hat. In de Grundschul hann’se als mit uns noch spiele wolle. Do hammer viel dumm Zeich gemach. Awwer später, wie mir sei Schwestre angefang hann se gefalle, do hann’se vun uns Buwe nix mee wisse wolle.
Ganz annerschd war’s a a beim alte Schoch. Do hat alles no Zigaar geroch un alte Leit. Sei Fraa is e bissl komisch wor und mei Oma hat gesaat: „Es Rosa is
vergesslich.“ Obwohl se annerschd wor is, war se immer ganz freindlich. De alt Schoch hat nimmie gut laafe kenne. Der hat de ganze Daa in seim Sessel gehockt, sei Stumbe geraacht und de Spiegel gelees. Uff dem Wohnzimmerdisch hann ganz viele Ausgawe vun der Zeitschrift geleeh. Wanner mich geruf hat, hatter immer wisse gewollt, was fer Noode ich vun de Schul heem gebrung hann. Annerschd wie bei uns hat de Schoch mir 2 Mark fer e Enser in Mathe gebb.
Annerschd wars a bei Wolfe. Die hann newerm Keller e ganz großer Hasestall
gehaat. Im dem Stall hann so Sticker 15 Hase drin gehockt. Wann ich mit de Buwe und de Hase gespielt hann, hammer immer uffbasse misse, dass mer die richtiche Hase wedder in die Käschde hockt. Sunscht hann die gerammelt odder sich gebiss. Die Buwe hann e alter Ranze gehaat, der war vollgestobbt mit Hefte vun Fix und Foxi oder Silberpfeil. Do hann ich stunnelang drin lese kenne, weil mei Mamme die Comix net hat leide kenne. Mit de Buwe hann ich a Fußball gespielt und die hann mich es allererschde Mol mitgenumm uff de Betze. Do wars a wedder annerschd.
Annerschd war’s aa im Zimmer vun meiner Freindin. In de Mädezimmer hann mee Kissjer uffem Bett gelee, es warn annere Poschter an de Wand un anneres Bettzeich. Es hat ganz annerscht geroch. Ich glaab, des hat net nur an de Reicherstäbcher gelee. Oft hammer mitnanner Tee mit Kandiszucker getrunk und verzeelt. Manchmal hammer a Schallblatte geheert und iwwer die Lehrer gescholl.Manchmol hammer geschmuust und uns gekisst. Do isses mer ganz annerschd wor.
- 2023, Kategorie: Lied, 1. Platz -
Fa eisch zwoh
Von Charly Weibel, Ludwigshafen
Du hoggsch widda ganz älloh em Fenschder.
Die Scheiwe, die sin immer noch vaschmiert.
Du freisch dich dass es heid ä bissl rehre dudd,
weil schunschd do draus goh nix mäh bassiert.
Du guggsch hald naus un sou gäid oh die Zeit rum.
De liewe lange Dohg glodsch du grohd naus.
Du frehgsch disch manschmohl ob des wirklich alles woh.
Doch du bleibsch hald em liebschde drin em Haus.
Dei Kinner hewwe sich lang nimmie gmeld.
Dei Enkel hosch schunn ewisch nimmie g’sehe.
Warum kumme die net öfter mohl bei dir vorbei.
Doch wer kann schun die junge Leid verstehe?
Un dann gäisch zu deine uralde Vitrin, un du guggsch die alde Bilder oh.
Un du denksch dann an die guhde alde Zeide.
Wie schäh die wohre, wie schäh die wohre, fa eisch zwoh.
Draus wärds langsohm dunkel, un ma sieht nix mäh.
Die ledschde Rejetropfe klatsche uff die Strohs.
Du schliesch die Fenschderfliggl un ziegsch de Vorhang zu.
Vielleicht isch jo mohje ä bissl mähna los.
Awwa du bisch noch ned mied unn willsch noch net ens Bett.
Du guggsch uff’d Uhr, die zeigt erschd halwa Neine.
Was sollschan jetzt noch mache, was sollschan jetzt noch duh?
Du wohsch blous, du willsch jetzt net schunn widda greine.
Un dann gäisch zu deine uralde Vitrin, un du guggsch die alde Bilder oh.
Un du denksch dann an die guhde alde Zeide.
Wie schäh die wohre, wie schäh die wohre, wie schäh die wohre, wie schäh die
wohre, fa eisch zwoh.
Fa eisch zwoh.
Fa eisch zwoh.
Fa eisch zwoh
- 2023, Kategorie: Lied, 2. Platz -
Sisyphos (hot soi Ruh)
Musik und Text: von Christoph Erbach, Mörlenbach; Gesang: Monji El Bej, Fußgönnheim
Strophe 01:
Am frieje Morge schäl´ ich mich aussem Bett
unn wünsch´ mich faschd sofort ins Neschd wieder noi,
doch de Blick aussem Fenschder macht des glei´ wieder wett´
unn gebt mer´s Gfiel, neigebore zu soi.
Wann ich de grüne Kamm vum Haardtrand seh´,
riech ich noch in de Kich de Duft vun de Bääm
unn des gebt mir jetzt Kraft, als ich zur Erwet fahr´,
heit Owend bin ich jo dann wieder dehäm.
Bridge:
Was hab ich gsucht,
was hab ich mich verdah´,
wie de Sisyphos hab ich mich gequält.
Unn dann endlich Ruh´,
ich bin unendlich noh draa
an dem änzigschde, was im Leewe zählt
Refrain:
Ich bin vum Elsass nuff zum Hunsrick
unn vum Saarland bis zum Roi
unn middedrinn, do fand ich moi Glick,
die Gegend kennt´ net schäner soi.
Ich brauch´ ken Palmeschdrand zum Leewe
unn kää Leit´ im Iwwerfluss.
Moi Palz, die dut mer alles gewe,
was ich uff Erde hawwe muss.
Strophe 02:
Beim schaffe bin ich, was Kollege betrefft,
werklich de weitgereiste vun uns all.
Ich hab´ schunn Orte g´seh, die kennt kaum en Mensch
unn dohie will ich nimmie allzuball.
Bin ich mol länger fort, hab´ ich de Blues,
ich drääm vun Wingerte faschd jedie Nacht.
Unn net bloos emol kams dann iwwer mich,
hab´ mich im Dunkle uff de Hämweg gemacht.
Bridge
Refrain
Hörprobe "Sisyphos (hot soi Ruh)"
- 2023, Kategorie: Lied, 3. Platz -
Außeseider
Musik und Text: Mario Bissinger, Kaiserslautern, gemeinsam vorgetragen von der Pälzer Cantry Bänd
Außeseider – ich bin e Außeseider,
ich werr gesellschaftlich net akzeptiert, weil: ich bin net tätowiert.
Außeseider – ich bin e Außeseider,
mei Haut, die is noch weiß wie Schnee vum Schädel bis zum klääne Zeh
Frieher war des ziemlich rar, dass ähner tätowiert mol war.
Nur Vebrecher un Matrose han sich tätowiere losse.
Doch heit, do is des ahgesaat: jeder Mann un jedie Fraa,
Dicke, Dinne, Alt un Jung, e jeder laaft mit Tättus rum.
Ich bin e Außeseider – e armer Außeseider,
alle Leit sin tätowiert, all minanner, außer mir.
Vun meiner alde Freundesclique losst kähner mehr sich bei mir blicke.
Ohne irgendäh Tattuu geheer ich nimmie dodezu.
Die Kerl, wo mol mei Freunde warn, han Doodekepp am Owwerarm.
Die Määd aus meim Bekanndekreis han all e Arschgeweih am Steiß.
Ich bin e Außeseider – e armer Außeseider,
wer sich net tätowiere losst, der werd vun allem ausgeschloss.
Ich bin e Außeseider – e armer Außeseider,
ich werr nimmie ahgegeguckt un manchmol sogar ahgespuckt.
Un sogar bei mir dehääm isses nimmie ahgenehm,
als Ähnzicher net tätowiert, lääb ich völlich isoliert.
Mei Fraa will nix mehr vun mir wisse, mei Kinner duhn mich nur noch disse
un ferr de Fall, dass ich mol sterb, han die sich selwer schun enterbt.
Ich bin e Außeseider – e armer Außeseider,
wer tätowiert is, is normal – wer’s net is, der is asozial.
(Aktualisiert 12.07.2023)